حمایت نگر میں دو کرانہ دکانوں سے گٹکھا ضبط، فوڈ اینڈ ڈرگ انتظامیہ کی کارروائی

ناندیڑ:4 جولائی(نمائندہ اعتبار) ناندیڑ کے اسسٹنٹ کمشنر، فوڈ اینڈ ڈرگ انتظامیہ کے دفتر کی ٹیم نے حمایت نگر میں اچانک کارروائی کرتے ہوئے شہر کی دو کرانہ دکانوں – پرنَو کرانہ اسٹورز اور سلیم کرانہ اسٹورز – کا معائنہ کیا۔معائنہ کے دوران، پرنَو کرانہ اسٹورز (دکشابھومی چوک، حمایت نگر) سے دیپک ہریش چندر امرت ساگر (عمر 28 سال، ساکن کالیکا نگر، حما یت نگر) کے قبضے سے ممنوعہ اشیاء جیسے راج نواس خوشبودار پان مسالہ، وِمل پان مسالہ، ڈائریکٹر اسپیشل پان مسالہ، مسافر پان مسالہ، ساگر پان مسالہ، گٹکھا اور مختلف اقسام کی خوشبودار تمباکو کی 27,688 روپئے مالیت کی اشیاء ضبط کی گئیں۔اس معاملے میں فوڈ سیفٹی آفیسر رشی کیش مروار نے دیپک ہریش چندر امرت ساگر کے خلاف فوڈ سیفٹی اینڈ اسٹینڈرڈز ایکٹ 2006 کی دفعات 26، 27، 30(2)(1)، 59 اور بھارتی تعزیری قانون کی دفعات 123، 223، 274، 275 کے تحت حمایت نگر پولیس اسٹیشن میں شکایت درج کروائی ہے۔
اسی طرح، سلیم کرانہ اسٹورز (قباء چوک، حمایت نگر) کے معائنہ کے دوران بھی راج نواس خوشبودار پان مسالہ، وِمل پان مسالہ، ساگر پان مسالہ، گٹکھا اور مختلف خوشبودار تمباکو کی 1,950 روپئے مالیت کی ممنوعہ اشیاء پائی گئیں۔اس دکان سے موجود شخص عبد الاحمد لال محمد (عمر 47 سال، ساکن سبھاش چوک، حمایت نگر) اور دکان کے مالک عبد الجبار عبد المجید (قباءچوک، حمایت نگر) کے خلاف فوڈ سیفٹی آفیسر انکیت بھِسے نے فوڈ سیفٹی اینڈ اسٹینڈرڈز ایکٹ 2006 کی مذکورہ دفعات اور آئی پی سی کے تحت حمایت نگر پولیس اسٹیشن میں شکایت درج کروائی ہے۔تفتیش کے بعد دونوں دکانوں کو سیل کر دیا گیا۔یہ کارروائی اسسٹنٹ کمشنر رام بھرکڑ اور اسسٹنٹ کمشنر سنجے چٹے کی رہنمائی میں فوڈ سیفٹی آفیسرز رشی کیش مروار، انکیت بھسے، ارون تمڈوار، ٹرینی فوڈ سیفٹی آفیسرز اویناش گری، محترمہ شلپا شریرامے، محترمہ امرتا دودھاٹے، سیمپلنگ اسسٹنٹ بالاجی سونٹکے اور پولیس انسپکٹر امول بھگت و دیگر پولیس اہلکاروں کی مدد سے انجام دی گئی۔