جھانسی میڈیکل کالج میں لگی آگ، 10 بچے ہلاک، متعدد زخمی

جھانسی:16 نومبر:جھانسی، اترپردیش کے مہارانی لکشمی بائی میڈیکل کالج میں جمعہ کی دیر رات پیش آئے ایک حادثے میں 10 بچے جھلس کر ہلاک ہوگئے۔ ضلع افسر اویناش کمار نے بتایا کہ کالج کے این آئی سی یو (بچوں کے وارڈ) کے اندرونی یونٹ میں رات 10.30 اور 10.45 کے درمیان آگ لگی۔ انڈور یونٹ میں زیادہ شدید بیمار بچے تھے جبکہ آٹ ڈور یونٹ میں کم شدید بیمار بچے تھے۔ انہوں نے کہا کہ ابتدائی معلومات کے مطابق 10 بچے جاں بحق ہو چکے ہیں۔ اس وقت وارڈ میں موجود ملازمین کا کہنا ہے کہ آگ شارٹ سرکٹ کے باعث لگی۔ ضلع مجسٹریٹ نے کہا کہ باہر کی یونٹ کے تمام بچوں کو بچا لیا گیا ہے۔ اندرونی یونٹ کے کچھ بچوں کو بھی بچا لیا گیا ہے۔ اب تک ایسی اطلاعات ہیں کہ 40 بچوں کو بچایا جا چکا ہے۔ جھانسی ڈویژن کے کمشنر بمل کمار دوبے نے بتایا کہ واقعہ کے وقت وارڈ میں 54-55 بچے داخل تھے۔ زخمی بچے ہسپتال میں زیر علاج ہیں۔ جھانسی ڈویژن کے ڈی آئی جی کالاندھی نیتھانی نے بتایا کہ آگ پر قابو پالیا گیا ہے۔ فائر بریگیڈ کی چھ گاڑیاں موقع پر پہنچ گئی ہیں اور پولیس کی ایک ٹیم موجود ہے۔ آگ لگنے کی وجہ معلوم نہیں ہو سکی ہے۔ وزیر اعلی یوگی آدتیہ ناتھ نے ہلاک ہونے والے بچوں کے سوگوار خاندانوں سے تعزیت کا اظہار کیا ہے۔ انہوں نے ضلعی انتظامیہ کے حکام کو ہدایت کی ہے کہ وہ زخمیوں کو فوری طور پر اسپتال لے جائیں اور انہیں مناسب علاج فراہم کیا جائے۔ اس کے ساتھ انہوں نے زخمیوں کی جلد صحت یابی کی بھی دعا کی۔ انہوں نے کمشنر اور ڈی آئی جی کی سربراہی میں تحقیقاتی ٹیم تشکیل دے کر 12 گھنٹے میں رپورٹ طلب کر لی ہے۔ نائب وزیر اعلی برجیش پاٹھک اور محکمہ صحت کے پرنسپل سکریٹری موقع پر روانہ ہو گئے ہیں۔ برجیش پاٹھک نے ایک پوسٹ میں لکھا ضلع انتظامیہ اور متعلقہ حکام کو جنگی بنیادوں پر راحت اور بچا کام کرنے کی ہدایت دی گئی ہے۔ میں خود جائے حادثہ پر پہنچ رہا ہوں۔ بھگوان شری رام سے دعا ہے کہ وہ نیک روحوں کو سکون عطا فرمائے اور زخمیوں کو جلد صحت یاب کرے۔