جھارکھنڈ میں چوتھی بار وزیر اعلی کے طور پر حلف : ہیمنت سورین کے نام کئی سیاسی ریکارڈ درج ہوں گے

رانچی: 28 نومبر:ہیمنت سورین چوتھی بار 28 نومبر کو شام 4 بجے جھارکھنڈ کے وزیر اعلی کے عہدے کا حلف لیں گے۔ اس کے ساتھ ہی جھارکھنڈ کی سیاسی تاریخ میں ان کے نام کئی ریکارڈ درج ہو جائیں گے۔ وہ ریاست کی 24 سالہ تاریخ میں چار بار وزیر اعلیٰ کے عہدے کا حلف لینے والے پہلے سیاست دان بن جائیں گے۔ اس سے پہلے ان کے والد شیبو سورین اور بھارتیہ جنتا پارٹی کے ارجن منڈا تین تین بار وزیر اعلیٰ کی کرسی پر بیٹھے ہیں۔ ہیمنت سورین نے جے ایم ایم، کانگریس اور آر جے ڈی اتحاد کی حمایت سے تشکیل دی گئی حکومت میں 13 جولائی 2013 کو پہلی بار وزیر اعلی کے طور پر حلف لیا۔ اس حکومت کی مدت 23 دسمبر 2014 تک تھی۔ انہوں نے 29 دسمبر 2019 کو دوسری بار حلف اٹھایا۔ 31 جنوری 2024 کو ای ڈی کے ذریعہ گرفتار ہونے کے بعد انہیں وزیر اعلی کے عہدے سے استعفیٰ دینا پڑا۔ ضمانت پر باہر آنے کے بعد، انہوں نے 4 جولائی 2024 کو تیسری بار وزیراعلیٰ کے عہدے کا حلف لیا۔ ہیمنت سورین کا نام جھارکھنڈ کے پہلے وزیر اعلی کے طور پر درج کیا جا رہا ہے، جو مسلسل دوسری بار حکومت میں واپس آئے ہیں۔ اس سے پہلے یہاں کوئی حکومت نہیں دہرائی گئی۔ ہیمنت سورین 81 رکنی جھارکھنڈ اسمبلی میں دو تہائی اکثریت کے ساتھ حکومت بنانے والے پہلے وزیر اعلیٰ بننے جا رہے ہیں۔ ان کی قیادت والے اتحاد نے 56 نشستیں حاصل کی ہیں۔ جھارکھنڈ میں سب سے زیادہ 2210 دن وزیر اعلیٰ کی کرسی پر بیٹھنے کا ریکارڈ ارجن منڈا کے پاس ہے۔ ان کے بعد ہیمنت سورین نے اب تک 2169 دن بطور وزیر اعلیٰ گزارے ہیں۔جیسے ہی چوتھی اننگز میں بطور وزیر اعلیٰ 40 دن گزریں گے، وہ اس کرسی پر سب سے زیادہ وقت تک بیٹھنے والے لیڈر بن جائیں گے۔ ہیمنت سورین کے نام اس لحاظ سے ایک ریکارڈ بھی بن رہا ہے کہ وہ ریاست کے پہلے وزیر اعلیٰ ہیں، جن کی اہلیہ کلپنا سورین، بطور ایم ایل اے، اسمبلی میں اعتماد کے ووٹ کے دوران حکومت کے حق میں ووٹ دیں گی۔