جموں و کشمیر کابینہ نے ریاست کا درجہ بحال کرنے کی تجویز پاس کی

سری نگر: 18 اکتوبر:ریاست کا درجہ بحال کرنے کی تجویز کو جموں و کشمیر کے وزیر اعلیٰ عمر عبداللہ کی زیر صدارت کابینہ کے اجلاس میں منظور کیا گیا۔ سرکاری ذرائع کے حوالے سے موصول ہونے والی معلومات کے مطابق جمعرات کو کابینہ کی پہلی میٹنگ میں جموں و کشمیر کابینہ نے مرکزی حکومت سے ریاست کا درجہ بحال کرنے کی اپیل کی۔ ذرائع کی مانیں تو تجویز کا مسودہ تیار کر لیا گیا ہے اور آنے والے دنوں میں وزیر اعلیٰ عمر عبداللہ دہلی آئیں گے اور یہ مسودہ وزیر اعظم نریندر مودی کو پیش کریں گے۔ میٹنگ کی صدارت وزیر اعلیٰ عمر عبداللہ نے کی اور اس میں نائب وزیر اعلی سریندر چودھری اور وزراء سکینہ مسعود ایتو، جاوید احمد رانا، جاوید احمد ڈار اور ستیش شرما نے شرکت کی۔ جے کے پی سی سی (جے کے پردیش کانگریس کمیٹی) کے صدر طارق حمید قرہ نے صحافیوں کو بتایا کہ ہماری پارٹی جموں و کشمیر کی کابینہ میں اس وقت تک شامل نہیں ہوگی جب تک ریاست کا درجہ بحال نہیں کیا جاتا۔ نیشنل کانفرنس کے صدر فاروق عبداللہ نے اس اعتماد کا اظہار کیا کہ مرکزی حکومت جلد ہی جموں و کشمیر کی ریاست کا درجہ بحال کر دے گی۔ انہوں نے کہا کہ ہم نے پہلے بھی اس بارے میں بات کی ہے اور آج بھی سپریم کورٹ نے دو ماہ کے اندر ریاست کی بحالی کا مطالبہ کرنے والی عرضی پر سماعت کرنے پر رضامندی ظاہر کی ہے۔ مجھے یقین ہے کہ بھارتی حکومت اسے جلد بحال کر دے گی۔ یہ پوچھے جانے پر کہ کیا نیشنل کانفرنس دفعہ 370 کا مسئلہ اٹھائے گی یا اسمبلی میں اس کے خلاف قرارداد پاس کرے گی، عبداللہ نے کہا کہ انہیں اپنے دلائل پیش کرنے کے لیے عدالت سے رجوع کرنا پڑے گا۔ لال چوک کا دورہ کرتے ہوئے عبداللہ نے کہا کہ سڑکوں پر کوئی وی آئی پی کلچر نہیں ہوگا اور لوگوں کو سائرن کی آواز سے سکون ملے گا۔ انہوں نے کہا کہ یہاں کوئی وی آئی پی نہیں ہے، مقامی ہو یا سیاستدان، سب برابر ہیں۔ آپ کو بتاتے چلیں کہ جموں و کشمیر کی سابقہ ریاستی حیثیت 2019 میں ختم ہو گئی تھی۔ 5 اگست 2019 کو حکومت ہند کی جانب سے آرٹیکل 370 کی منسوخی کے بعد جموں و کشمیر کو دو مرکزی زیر انتظام علاقوں جموں و کشمیر اور لداخ میں تقسیم کر دیا گیا تھا۔