تحریکِ طالبِ علم ( اقوالِ زرین۔ قسط:11)

٭ جو لوگ انجام سے ڈرتے ہیں وہ اپنا آغاز کمزور حوصلوں سے کرتے ہیں۔

٭ اپنے مقصد کو پانے والے نہ کبھی پاؤں کے چھالے دیکھتے ہیں نہ راہ میں پڑے کانٹے۔

٭ علم میں وہ طاقت ہے جس سے سب کچھ نہ سہی لیکن بہت کچھ فتح کیا جاسکتا ہے۔

٭ قوم کی خستہ حالی کا سبب کون ہیں؟ دوسرے یا ہم، اس بارے میں ضرور سوچئے۔

٭ اپنے آپ کو کمزور سمجھنا‘ دوسروں سے نہیں بلکہ اپنے آپ سے ہارنے کے برابر ہے۔

٭ حالات کی کسوٹی پر وہی لوگ پرکھے جاتے ہیں جو ذہنی طور پر مضبوط ہوتے ہیں۔

٭ آج ہماری قوم ترقی کے میدان میں کس مقام پر کھڑی ہے ، کیا ہمیں کچھ پتہ بھی ہے؟

٭ جو قوم اخبارات، رسائل و کتب پڑھنے سے قاصر ہے وہ قوم ترقی کرنے سے بھی قاصر رہے گی۔

٭ بننا ہے تو تعریف کے قابل بنو، ورنہ نفرت کے قابل دُنیا میں تو بہت سے لوگ ہیں!

٭ تعلیم حاصل کرنے کا مقصد صرف وقت گزاری نہیں بلکہ خود کو ایک عظیم الشان انسان بنانے کی تخلیق ہے۔

٭ جو قوم خود بخود بکھرنا شروع ہوجاتی ہے تو پھر اُس کے زوال کے لیے دُشمنوں کی بھی ضرورت نہیں رہتی۔

٭ ہم اس دُنیا میں کامیاب زندگی جینے کے لیے آئے ہیں شکست خوردہ زندگی گزارنے کے لیے نہیں۔

٭ لوگوں کو اُن کی گفتگو سے پہچاننے کی کوشش مت کیجئے، بلکہ اُن کے اعمال سے پہچاننے کی کوشش کیجئے۔

٭ دُنیا میں اچھائی بھی بہت ہے اور برائی بھی بہت ہے، ہم جسے زیادہ ڈھونڈتے ہیں وہی ہمیں ملتی ہے۔

٭ اپنی قابلیت کو کبھی زنگ مت لگنے دیجیے، کیوں کہ جب لوہے کو زنگ لگتا ہے تو اُس کی قدر و قیمت گھٹ جاتی ہے۔

٭ خواب دیکھنا اور خوابوں کے لیے لڑنے میں بہت فرق ہے، جو خوابوں کے لیے لڑتے ہیں اکثر وہی کامیاب بھی ہوتے ہیں۔

٭ بعض لوگ زندگی سے بہت کچھ لیتے ہیں اور بعض لوگ زندگی کو بہت کچھ دیتے ہیں۔ آپ کیسے لوگ بننا پسند کریں گے؟

٭ اپنے اندر موجود قابلیت کے خزانوں کو ڈھونڈیئے۔ اگر وہ مل جائے تو نہ آپ غریب رہیں گے نہ آپ کی قوم!

٭ غفلت کی نیند سونے والے ہمیشہ برباد ہوتے ہیں اور بامقصد جاگنے والے ہمیشہ آباد۔ آپ کیا کرنا پسند کریں گے۔

٭ ہم اپنے لیے کتنے اچھے ہیں اِس سے کوئی فرق نہیں پڑتا، بلکہ ہم دوسروں کے لیے کتنے اچھے ہیں اِس سے بہت فرق پڑتاہے۔

٭ اچھا انسان وہ نہیں ہوتا جو خود کو اچھا انسان سمجھے بلکہ اچھا انسان وہ ہوتا ہے جسے اچھے اور برے دونوں انسان بھی اچھا انسان سمجھے۔

٭ شکست کھانے کے بعد اپنے حوصلوں میں اتنی طاقت پیدا کرو کہ پھر کبھی شکست تمہیں شکست دینے کی ہمت نہ کرے۔

٭ عقلمند اور بیوقوف میں فرق صرف اِتنا ہے کہ عقلمند کی باتیں عقلمند بھی سمجھ سکتا ہے جب کہ بیوقوف کی باتیں بیوقوف بھی سمجھ نہیں سکتا۔

٭ اچھائی کا کوئی بدل نہیں ہوتا کیوں کہ وہ انمول ہوتی ہے، اس لیے تو بعض لوگ اچھائی کے بدلے اچھائی کی اِتنی زیادہ قیمت چکا نہیں سکتے۔

٭ ہم ابتدائی کوشش میں بڑی کامیابی حاصل کرنا چاہتے ہیں جب کہ ابتدائی کوشش کامیابی کی طرف بڑھنے کا صرف آغاز ہے انجام نہیں!