بڑھتے ہوئے درجۂ حرارت سے بچاؤ کے لئے ضلع محکمۂ صحت کی اپیل

ناندیڑ:11؍مارچ (نمائندہ اعتبار) گزشتہ چند دنوں سے ضلع ناندیڑ میں گرمی کی شدت مسلسل بڑھ رہی ہے۔ بڑھتے ہوئے درجۂ حرارت کے باعث صحت پر منفی اثرات مرتب ہونے کے خدشہ کے پیش نظر ضلع ہیلتھ آفیسر نے عوام سے احتیاطی تدابیر اختیار کرنے کی اپیل کی ہے۔ محکمۂ صحت کی جانب سے کہا گیا ہے کہ شہری لو لگنے (ہیٹ اسٹروک) سے بچنے کے لئے انتظامیہ کی جانب سے جاری کردہ رہنما ہدایات پر عمل کریں۔
گرمیوں میں صحت کو لاحق ہونے والی ممکنہ تکالیف:
شدید گرمی کی وجہ سے جسم میں پانی کی کمی ہو سکتی ہے جس کے نتیجہ میں درج ذیل مسائل پیدا ہو سکتے ہیں:
اسہال (Diarrhea) اور قے، چکر آنا یا شدید تھکن محسوس ہونا، سر درد اور بے چینی، جلد میں خارش یا گھموریوں کا ہونا، جبکہ لو لگنا ایک انتہائی سنگین حالت ہے جس میں جسم کا درجۂ حرارت اچانک بڑھ جاتا ہے اور مریض بے ہوش بھی ہو سکتا ہے۔
کیا کرنا چاہئے؟
زیادہ پانی پئیں: پیاس نہ بھی لگے تو دن بھر میں کم از کم 3 تا 4 لیٹر پانی پئیں۔
گھر سے باہر نکلتے وقت احتیاط کریں: سر پر ٹوپی، رومال یا چھتری کا استعمال کریں اور آنکھوں کے تحفظ کے لئے سن گلاسز لگائیں۔
مشروبات کا استعمال بڑھائیں: لیموں شربت، چھاچھ، لسی، او آر ایس (ORS)، ناریل پانی اور گھریلو قدرتی مشروبات کا زیادہ استعمال کریں۔
لباس: ہلکے، سوتی اور سفید رنگ کے کپڑے پہنیں۔
غذا: کھانے میں کھیرا، تربوز، انگور جیسے پانی سے بھرپور پھل شامل کریں۔
کیا چیزیں ٹالنی چاہئیں؟
دوپہر کے اوقات: دوپہر 12 بجے سے 4 بجے تک تیز دھوپ میں باہر جانے سے حتیٰ الامکان پرہیز کریں۔
نشہ آور اشیاء: شراب نوشی، چائے، کافی اور زیادہ شکر والے مشروبات سے پرہیز کریں کیونکہ ان سے جسم میں پانی کی کمی جلد ہوتی ہے۔
باسی غذا: گرمیوں میں کھانا جلد خراب ہو جاتا ہے اس لئے باسی یا کھلے میں رکھی ہوئی چیزیں نہ کھائیں۔
مشقت والے کام: سخت دھوپ میں زیادہ محنت یا ورزش کرنے سے گریز کریں۔
اگر لو لگ جائے تو کیا کریں؟
اگر کسی شخص کو دھوپ کی وجہ سے چکر آئے یا وہ بے ہوش ہو جائے تو اسے فوراً سایہ دار یا ٹھنڈی جگہ پر لے جائیں، اس کے کپڑے ڈھیلے کریں، ٹھنڈے پانی سے جسم پونچھیں اور اگر ممکن ہو تو برف کے ٹکڑے گردن اور بغل میں رکھیں۔ اگر مریض ہوش میں ہو تو اسے پانی یا او آر ایس پلائیں اور فوری طور پر قریبی سرکاری اسپتال یا پرائمری ہیلتھ سینٹر میں داخل کریں۔
خصوصی ہدایت: چھوٹے بچے، حاملہ خواتین اور بزرگ افراد کو گرمی کی لہر کے دوران خاص احتیاط برتنی چاہئے۔ کسی بھی قسم کی طبیعت خراب ہونے کی صورت میں گھریلو علاج کے بجائے ڈاکٹر سے مشورہ لینا ضروری ہے۔