جعلی راشن کارڈ بنانے والے سیتو آپریٹر پر مقدمہ درج

ناندیڑ:24 مارچ(نمائندہ اعتبار) ناندیڑ دیہی علاقے میں جعلی راشن کارڈ بنانے والے سیتو آپریٹر کے خلاف آج مقدمہ درج کیا گیا۔ تحصیلدار ناندیڑ سنجے وارکڑ نے عوام سے اپیل کی ہے کہ وہ بغیر اہل ہونے کے راشن کارڈ حاصل کرنے کی کوشش نہ کریں اور کسی کے جھوٹے دعوے کا شکار نہ ہوں۔آج تحصیل آفس ناندیڑ کے سپلائی ڈپارٹمنٹ میں ایک شخص شکایت کرنے آیا تھا کہ اس کا راشن کارڈ آن لائن ہو گیا ہے، لیکن اسے غلہ نہیں مل رہا ہے۔ جب ملازمین نے مزید جانچ کی تو پتہ چلا کہ اس کا راشن کارڈ ہی جعلی ہے۔متعلقہ شخص کو صرف آن لائن ایک پیج دیا گیا تھا، جبکہ درحقیقت اس کا راشن کارڈ جعلی نکلا۔ معاملہ سامنے آتے ہی وزیر آباد پولیس اسٹیشن کے انسپکٹر کو بلا کر اس شخص کو ان کی تحویل میں دے دیا گیا۔ سپلائی انسپکشن آفیسر رویندر راٹھوڑ کو مجاز بنا کر متعلقہ سیتو آپریٹر کے خلاف مقدمہ درج کیا گیا۔ تفتیش کے دوران اس کے ذریعے جاری کردہ 6 جعلی راشن کارڈ برآمد ہوئے ہیں۔اس معاملے میں سیتو آپریٹر رُشیکیش پیدیواڑ (ساکن سڈکو، ناندیڑ) کے خلاف مقدمہ درج کیا گیا ہے۔ تحصیلدار سنجے وارکڑ نے عوام سے اپیل کی ہے کہ وہ تحصیل آفس کے کسی بھی دستاویز کے حصول یا سہولت کے لیے صرف مقامی ملازمین سے ہی رابطہ کریں۔ ایجنٹ یا اجنبی افراد کے جھانسے میں نہ آئیں۔