ناندیڑ: 10 ؍مئی(نمائندہ اعتبار) فی الحال ناندیڑ ضلع کا درجہ حرارت 43 ڈگری کے قریب پہنچ چکا ہے اور موسم میں شدید گرمی محسوس کی جا رہی ہے، جس کے نتیجے میں بجلی کی مانگ میں اضافہ ہوا ہے، جبکہ سپلائی کم پڑ رہی ہے۔ اس باعث بجلی کی بار بار بندش کے واقعات بڑھ گئے ہیں۔ اس سلسلے میں مہا وترن محکمہ کو ضروری اقدامات کر کے بجلی کی سپلائی باقاعدہ رکھنے کی ہدایت ضلع کلکٹر راہول کرڈیلے نے دی ہے۔آج ضلع کلکٹر راہول کرڈیلے نے کلکٹر دفتر میں مہا وترن کے کاموں کا جائزہ لیا۔ اس موقع پر ریزیڈنٹ ڈپٹی کلکٹر مہیش وڈدکر، سپرنٹنڈنگ انجینئر سدھاکر جاڈھو، ایگزیکٹو انجینئر ونئے بہادر، روم دیو چوہان، منگیش بورگاؤنکر اور دیگر افسران و ملازمین موجود تھے۔کلکٹر نے ہدایت دی کہ مانسون سے قبل کے تمام کام ترجیحی بنیاد پر مکمل کیے جائیں۔ بجلی کے مسائل پر صارفین و شہریوں سے بہتر رابطہ رکھا جائے۔ سب اسٹیشن کے ٹرانسفارمر کی صلاحیت میں اضافہ کیا جائے، وزیر اعلیٰ سور یوجنا 2.0 اور دیگر اسکیموں کے تحت سب اسٹیشنز کی توسیعی سرگرمیاں ترجیحی طور پر مکمل کی جائیں۔ مشینری کو الرٹ موڈ پر رکھا جائے اور صارفین کے موبائل نمبر اپڈیٹ کیے جائیں۔ کلکٹر راہول کرڈیلے نے واضح کیا کہ سب اسٹیشنز پر ٹرانسفارمر کی صلاحیت بڑھانے کا کام 10 دنوں میں مکمل ہونا چاہئے۔ساتھ ہی کلکٹر نے ہدایت دی کہ مرمت کے کاموں کے دوران صارفین کو پریشانی نہ ہو، اس کے لیے پیشگی اطلاع بذریعہ میسج دی جائے تاکہ شکایات میں اضافہ نہ ہو۔ مرمت کے دوران جدید مشینوں کا استعمال بڑھایا جائے اور اس کے لیے ضروری آلات و سازوسامان خریدے جائیں۔ناندیڑ ضلع میں 1,725 دیہات اور 720 واڑی پڑے ہیں، جہاں مہا وترن کے ذریعے بجلی کی فراہمی کی جا چکی ہے۔ ضلع میں مجموعی طور پر 6 لاکھ 29 ہزار 147 بجلی صارفین ہیں۔ گرمی کے پیش نظر مانگ کے مطابق بجلی کی سپلائی کم پڑ رہی ہے۔ اس کے لیے مہا وترن کی جانب سے سب اسٹیشنز پر ٹرانسفارمر کی صلاحیت بڑھانے کا کام جاری ہے تاکہ یہ مسئلہ جلد حل کیا جا سکے۔ یہ اطلاع سپرنٹنڈنگ انجینئر سدھاکر جاڈھو نے دی۔اس موقع پر وزیر اعلیٰ سور یوجنا 2.0، نئے سب اسٹیشنز، سور توانائی اسکیم، نظام میں اصلاحات، اضافی ٹرانسفارمر، ABD اسکیم کے تحت مجوزہ کاموں، نئی اسکیموں، بجلی کی تقسیم میں اصلاحات، لائن الگ کرنے کے اقدامات، سولر پراجیکٹس سمیت جاری ترقیاتی کاموں کی تفصیلات پریزنٹیشن کے ذریعے پیش کی گئیں۔
