اچانک آئے ہوئے سیلاب سے سیاح بال بال بچ گئے

کنوٹ: 3؍نومبر(محمد اکرم چوہان) تعلقہ کے مشہور سیاحتی مقام شیخ فرید وجرا آبشار پر اتوار 2؍نومبر کی شام ایک بڑا حادثہ ٹل گیا۔ شام تقریباً 5 بجے اچانک بارش شروع ہوئی اور پانی کا بہاؤ تیز ہو گیا، جس کی وجہ سے ناگپور سے آئے ہوئے 7 سیاح، جن میں ایک خاتون، تین لڑکیاں اور تین مرد شامل تھے، آبشار کے دامن میں پھنس گئے۔تاہم سیاح خوش قسمتی سے محفوظ رہے۔ حالات سنگین ہوتے ہی وہاں موجود دیگر سیاحوں کے ساتھ گھریلو محافظ دستے کے ملازم شتروگھن چاندیکر، مقامی شہری سید اسحاق، پردیپ جوشی اور گوپال گیتے نے فوری طور پر حاضر دماغی کا مظاہرہ کرتے ہوئے انسانی زنجیر بنا کر بچاؤ کارروائی شروع کی۔ سبھی نے مل کر ان ساتوں سیاحوں کو بروقت پانی سے بحفاظت باہر نکالا۔ ان کی جرأت مندی اور بروقت اقدام کے باعث بڑے سانحہ سے بچاؤ ہونے کی بات کہی جا رہی ہے۔شیخ فرید وجرا کے اطراف کا آبشار گزشتہ چند دنوں سے جاری بارش کے سبب لبریز ہو کر بہہ رہا ہے۔ آنکھوں کو بھا جانے والا دلکش منظر دیکھنے کے لیے روزانہ بڑی تعداد میں سیاح یہاں پہنچتے ہیں۔ تاہم پانی کے بہاؤ میں اچانک اضافہ ہونے کے واقعات کے پیش نظر انتظامیہ نے عوام سے احتیاط برتنے کی اپیل کی ہے۔