اقلیتی اداروں پر بے بنیاد الزامات برداشت نہیں کیے جائیں گے : وسیم برہان

اکلکووا:14؍دسمبر (نامہ نگار) : مہاراشٹرا ریاستی اقلیتی کمیشن کے ریاستی رکن وسیم برہان نے الزام لگایا ہے کہ بی جے پی لیڈر کریٹ سومیا اقلیتی اداروں اور افراد کے خلاف بے بنیاد الزامات لگا کر ہمیشہ اقلیتی مسلم کمیونٹی کو نشانہ بنا رہے ہیں۔ انہوں نے کہا کہ انہیں ادارے کی انتظامیہ سے اطلاع ملی ہے کہ اکلکووا میں ایک اقلیتی تعلیمی ادارے پر ادارے کو بدنام کرنے کے لیے مختلف غیر قانونی اور جھوٹے الزامات لگائے جا رہے ہیں۔ اور مسلمانوں کو پریشان کرنے کی سوچی سمجھی سازش کی جارہی ھے۔برہان نے آگے کہا،’’ریاست میں اقلیتی ادارے آئین کے دیے گئے حقوق اور اختیارات کے مطابق کام کر رہے ہیں۔ کوئی بھی انکوائری یا کارروائی قانون کے دائرے میں، مجاز اتھارٹی کے ذریعے کی جانی چاہیے۔ صرف الزامات کی بنیاد پر دباؤ ڈالنا، بدنام کرنا اور غیر ضروری تکلیف دینا جمہوریت اور قانون کی خلاف ورزی ھے "‘انہوں نے مزید کہا، ’’ہم ریاست میں اقلیتی افراد، برادریوں اور اداروں کے خلاف کسی بھی غیر قانونی اور بے بنیاد کارروائی کی اجازت نہیں دیں گے۔ اقلیتی کمیشن ایسے واقعات کو سنجیدگی سے دیکھ رہا ہے اور اگر ضرورت پڑی قانونی اقدامات کیے جائیں گے۔‘‘ دریں اثناء برہان نے اس اعتماد کا اظہار بھی کیا کہ متعلقہ تعلیمی ادارے نے تمام قواعد و ضوابط پر عمل کیا ہے اور اصل صورتحال سامنے آئے گی۔