اقرا اردو ہائی اسکول میں ایس ایس سی بورڈ طلبہ کے اعزاز میں شاندار الوداعی تقریب

پربھنی:18 فروری ( ضلع نامہ نگار اعتبار نیوز محمد سرو شریف )اقرا اردو ہائی اسکول میں ایس ایس سی بورڈ کے طلبہ کے اعزاز میں ایک شاندار الوداعی تقریب کا انعقاد کیا گیا۔ اس تقریب کی نظامت کے فرائض محترمہ ملیحہ فردوس سید ارشد علی اور بی بی عائشہ سیدہ یونس نے انجام دیے۔تقریب کا آغاز تلاوتِ قرآنِ پاک سے ہوا، جس کے بعد نعتِ رسول مقبول صلی اللہ علیہ وسلم پیش کی گئی۔ اس بابرکت آغاز کے بعد مہمانانِ خصوصی نے طلبہ کو ان کے مستقبل کے لیے نیک تمناؤں سے نوازا۔مہمانِ خصوصی ڈاکٹر فرحانہ شیخ امیر، جو خود بھی اقرا اردو ہائی اسکول کی سابق طالبہ رہ چکی ہیں، نے طلبہ کو نہایت حوصلہ افزا اور رہنمائی سے بھرپور خطاب کیا۔ انہوں نے اپنی تعلیمی زندگی کے تجربات شیئر کرتے ہوئے طلبہ کو محنت، لگن اور استقامت کے ساتھ اپنے خوابوں کی تعبیر حاصل کرنے کا مشورہ دیا۔اس موقع پر محترم سید مجاہد علی سر، عشرت میڈم اور سید مشتاق علی سر نے بھی طلبہ کو امتحانات کی تیاری کے حوالے سے قیمتی نصیحتیں کیں اور انہیں ہمت و حوصلے کے ساتھ آگے بڑھنے کی ترغیب دی۔اس تقریب کے ایک اور معزز مہمان، محترم مزمل سر، نے طلبہ کو نہ صرف امتحانات کی تیاری بلکہ امتحان کے بعد کے مواقع اور کیریئر کے حوالے سے قیمتی مشورے دیے۔ انہوں نے طلبہ کو ہمت اور خوداعتمادی کے ساتھ آگے بڑھنے اور اپنے خوابوں کو حقیقت میں بدلنے کی ترغیب دی۔آخر میں اقرا اردو ہائی اسکول کے تمام اساتذہ نے طلبہ کے روشن مستقبل کے لیے نیک تمناؤں کا اظہار کیا اور دعا کی کہ وہ امتحانات میں شاندار کامیابی حاصل کریں اور اپنے والدین، اساتذہ اور ادارے کا نام روشن کریں۔