اسٹاک مارکیٹ میں سرمایہ کاروں کا 30 لاکھ کروڑ کا نقصان، جے پی سی تحقیقات کرے: راہل گاندھی

نئی دہلی: 6 جون:کانگریس کے رکن پارلیمنٹ راہول گاندھی کا کہنا ہے کہ ایگزٹ پول کی وجہ سے چھوٹے خوردہ سرمایہ کاروں کو اسٹاک مارکیٹ میں 30 لاکھ کروڑ روپے کا نقصان ہوا ہے۔ وزیراعظم، وزیر داخلہ اور وزیر خزانہ نے انتخابات کے وقت سرمایہ کاروں کو اسٹاک مارکیٹ میں پیسہ لگانے کا مشورہ دیا تھا۔ اسے ایک بڑا گھوٹالہ قرار دیتے ہوئے راہل گاندھی نے مشترکہ پارلیمانی کمیٹی (جے پی سی) سے تحقیقات کرانے کا مطالبہ کیا ہے۔ راہل گاندھی کا کہنا ہے کہ انتخابات کے دوران وزیر اعظم نے دو تین بار اسٹاک مارکیٹ میں اضافے کی بات کی۔ وزیر داخلہ نے براہ راست کہا کہ یہ 4 جون کو آسمان پر جائے گا، لوگ اسے خرید لیں۔ وزیر خزانہ نے بھی یہی باتیں دہرائیں۔ راہل گاندھی نے الزام لگایا کہ انٹیلی جنس ایجنسی نے حکومت کو پہلے ہی بتا دیا تھا کہ اسے 200 سے 220 سیٹیں ملنے کی امید تھی، اس کے باوجود خوردہ سرمایہ کاروں کو اسٹاک مارکیٹ میں سرمایہ کاری کرنے کا مشورہ دیا گیا۔ اس کے ساتھ ہی غلط ایگزٹ پول کی وجہ سے پہلے اسٹاک مارکیٹ میں زبردست تیزی دیکھنے میں آئی اور پھر دوسرے دن جب نتائج آئے تو بڑی گراوٹ دیکھی گئی۔ انہوں نے کہا کہ اس گراوٹ کی وجہ سے اسٹاک مارکیٹ میں سرمایہ کاری کرنے والے 5 کروڑ سے زائد خاندانوں کو لاکھوں کروڑوں روپے کا نقصان ہوا ہے۔ ایگزٹ پولز اور اسٹاک مارکیٹ کے درمیان تعلق کو بھی جے پی سی کو جانچنا چاہیے۔ ان کا الزام ہے کہ یہاں کسی نے چھوٹے ہندوستانی خوردہ سرمایہ کاروں کے خرچ پر لاکھوں کروڑوں روپے کمائے ہیں۔ کانگریس ایم پی نے کہا کہ اس پورے معاملے میں ہم وزیر اعظم، وزیر داخلہ، غیر ملکی سرمایہ کاروں اور ایگزٹ پولسٹرس کے خلاف تحقیقات چاہتے ہیں۔ 4 جون کو کیا ہونے والا ہے اس کی اطلاع حکومت کے پاس تھی۔ جب وزیراعظم، وزیر داخلہ اور وزیر خزانہ خود اس طرح کی باتیں کرتے ہیں تو لوگ سرمایہ کاری کرتے ہیں۔ یہ ایک بہت بڑا گھوٹالہ ہے، جس میں چھوٹے سرمایہ کاروں کو لاکھوں اور کروڑوں روپے کا نقصان ہوا۔ اب پارلیمنٹ کے اندر اپوزیشن کی طاقت پہلے سے زیادہ ہے۔ اپوزیشن اس معاملے پر پارلیمنٹ میں اپنا موقف پیش کرے گی اور جے پی سی انکوائری کے لیے حکومت پر دباؤ ڈالا جائے گا۔