ادھو ٹھاکرے کے قافلے پر گائے کے گوبر سے حملہ

ممبئی، 11 اگست:ـمہاراشٹر کے سابق وزیر اعلیٰ اور شیو سینا (یو بی ٹی) کے سربراہ ادھو ٹھاکرے کے قافلے پر مہاراشٹر نو نرمان سینا کے کارکنوں نے گائے کے گوبر سے حملہ کیا ہے۔ اب اس واقعہ کو لے کر مہاراشٹر میں سیاست تیز ہو گئی ہے۔ شیو سینا (یو بی ٹی) نے راج ٹھاکرے پر حملہ کیا اور ان کی پارٹی کو سپاری باز قرار دیا۔ شیو سینا (یو بی ٹی) کے ترجمان آنند دوبے نے کہا، ”اب یہ سمجھ میں آئی ہے کہ راج ٹھاکرے اور ان کی پارٹی کو سپاری کیوں کہا جاتا ہے۔ جس طرح سے تھانے میں ادھو ٹھاکرے کے قافلے پر حملہ ہوا تھا۔ "یہ واقعہ حکومت پر سوال اٹھاتا ہے کہ وہ مہاراشٹر کے سابق وزیر اعلی کو سیکورٹی کیوں فراہم نہیں کر سکی۔” شیوسینا (یو بی ٹی) نے مہاراشٹر کے وزیر داخلہ سے استعفیٰ کا مطالبہ کیا ہے۔ انہوں نے کہا کہ ریاست میں لاء اینڈ آرڈر تباہ ہوچکا ہے۔ اگر اس طرح کے حملہ سی ایم ایکناتھ شندے کے آبائی ضلع میں ہوتے ہیں تو صاف ہے کہ اس کے لیے ٹھیکہ لیا گیا ہے۔ پہلے لوگ کہتے تھے کہ راج ٹھاکرے اور ان کی پارٹی ٹھیکے دار ہیں۔ لیکن اب اس بات کی تصدیق ہوگئی ہے کہ جس طرح ہمارے لیڈر ادھو ٹھاکرے کے قافلے پر تھانے میں حملہ ہوا ہے۔ یہ بہت شرمناک ہے۔ ایکناتھ شندے کی حکومت پوری طرح ناکام ہو چکی ہے۔ دیویندر فڑنویس کو مستعفی ہو جانا چاہیے۔ ساتھ ہی مہاراشٹر نو نرمان سینا نے ادھو ٹھاکرے پر حملے کی ذمہ داری قبول کر لی ہے۔ ایم این ایس تھانے-پالگھر ضلع کے صدر اویناش جادھو نے کہا، "کچھ شیو سینکوں نے راج ٹھاکرے کی گاڑی کے سامنے احتجاج کرنے کی کوشش کی تھی۔ ایم این ایس نے بھی اس پر ردعمل ظاہر کیا ہے۔ ہمارے کارکنوں نے 15 سے زائد گاڑیوں پر گوبر پھینکا ہے۔ اگر کوئی شیوسینک راج ٹھاکرے کے خلاف جائے گا تو اسے بھی ایسا ہی جواب دیا جائے گا۔ اور انہیں گھر کے اندر مارا پیٹا جائے گا۔